Monday, December 26, 2011

မိတ်ဆွေတုကို သတိပြုပါ

လူ့လောကတွင် အဆင်ပြေအောင် နေထိုင်နိုင်ရေးသည် အပေါင်းအသင်းများနှင့် ဆက်သွယ်၍နေ၏။ အပေါင်းအသင်းမထားဘဲ သီးခြားလွတ်လပ်စွာနေ၍ မဖြစ်ပေ။ ထို့ကြောင့် အလုပ်ပြီးမြောက်အောင်၊ စိတ်ချမ်းသာအောင်၊ စီးပွားတိုးတက်အောင် မိတ်ဆွေကောင်း ရွေးချယ်တတ်ရန်နှင့် မိတ်ဆွေတု ရှောင်နိုင်ရန် အရေးကြီးပေသည်။ 

ဤနေရာ၌ မြတ်စွာဘုရားက ကောသလမင်းကြီးအား ဟောညွှန်ပုံကို သတိပြုသင့်၏။ ဘုရားရှင်က မိန့်တော်မူ သည်မှာ---“ပုဂ္ဂိုလ်တယောက်၏ အကျင့်သီလ၊ အလေ့အထ၊ သဘောသကာယကို ကြာကြာပေါင်းကြည့်မှ သိနိုင်သည်။ ကြာကြာပေါင်းသော်လည်း သူ့အကြောင်းကို သတိထား လေ့လာမှ သိနိုင်သည်။ သတိထားသော်လည်း မိမိက စဉ်းစားဝေဖန်တတ်သော ဉာဏ်ရှိမှ သိနိုင်သည်။ မစဉ်းစား မဝေဖန်လျှင် မသိနိုင်” ဟူ၏။
တနေရာတွင် မြတ်စွာဘုရားက မိတ်ဆွေတု ၄-မျိုး၊ မိတ်ဆွေစစ် ၄-မျိုးကို ပြတော်မူ၏။
မိတ်ဆွေတု ၄-မျိုးမှာ---
(၁) အညဒတ္ထုပရမ မိတ်ဆွေတု=သူကသာ တောင်းတတ်၊ သူကသာ အသာယူတတ်သော မိတ်ဆွေတု။
မိမိက အနည်းငယ်ပေး၍ များများပြန်ရရန် မျှော်လင့်တတ်၏။ 
အကူအညီ လိုသောအခါ တကယ် စိတ်ရင်းစေတနာ မပါဘဲ တစုံတခုသော အကျိုးကို မျှော်လင့်၍ အပိုအမို လောကွတ်နှင့် ဟန်ဆောင် လုပ်ပေးတတ်၏။

(၂) ဝစီပရမ မိတ်ဆွေတု=နှုတ်သာပါ၍ လက်မပါသော မိတ်ဆွေတု။
လွန်ပြီးသောပစ္စည်းဖြင့် လောကွတ်လုပ်တတ်၏။ (မနေ့ကသာလာရင် ပေးနိုင်မှာပဲ၊ အခုတော့ ...)
နောက်လာမည့် ပစ္စည်းဝတ္ထုဖြင့် လောကွတ်လုပ်တတ်၏ (နောက်တခါတော့ အဆင်ပြေမှာပါ...)
အကူအညီတောင်းလျှင် အကြောင်းပြ၍ ငြင်းဆိုတတ်၏။ (မလွယ်လို့ပါ၊ မအားလို့ပါ၊ ချို့ယွင်းနေလို့ပါ စသည်ဖြင့် ရှောင်ဖယ်ခြင်း)

(၃) အနုပီယဘာဏီ မိတ်ဆွေတု=အလိုလိုက်၍ အကြိုက်ကိုသာ ပြောဆိုလေ့ ရှိ၏။
မကောင်းမှုကိစ္စများကို အားပေးအားမြှောက်ပြု၍ လိုက်လျောပြောဆိုတတ်၏။ 
ကုသိုလ်ကောင်းမှု ကိစ္စတွင် မိမိအကျိုး ရည်ရွယ်ချက်ကြောင့် ဟန်ဆောင်လိုက်လျောတတ်၏။ 
မိမိရှေ့တွင် အကြောင်းရှာ၍ ချီးမွမ်းပြောဆို အမွှမ်းတင်တတ်၏။ မျက်ကွယ်တွင် အပြစ်ပြော၍ အကျိုးပျက်စီးအောင် လုပ်တတ်၏။

(၄) အပါယသဟာယ မိတ်ဆွေတု=ပျက်စီးကြောင်းအမှုကိစ္စတို့၌ အပေါင်းအဖော် ပြုတတ်၏။
သေရည်အရက် သောက်ရာ၌ အဖော်ဖြစ်၏။ ပွဲလမ်းသဘင် စသော ပျော်ရွှင်မှု အလုပ်ပျက်လောက်အောင် လိုက်စားရာ၌ သွားဖော်သွားဖက် ဖြစ်၏။ အလောင်းအစား အကစားအလုပ်၌ အဖော်အဖြစ် အားပေးအားမြှောက် လုပ်၏။

ဒွါဒသနိပါတ် မိတ္တာမိတ္တဇာတ်တော်၌လည်း မိတ်ဆွေတု (ရန်သူ)၏ အချင်းအရာ လက္ခဏာများကို ရှစ်မျိုးခွဲခြား၍ ပြထားရာ မိတ်ဆွေတုကို ရှောင်ကြဉ်ရန် ကိစ္စသည် အရေးကြီးသောအချက် ဖြစ်သည်ကို သတိပြုသင့်ပေသည်။

No comments: