Monday, June 18, 2012

တန့်ကြည်တောင် ဝိပဿနာရိပ်သာ တာဝန်ခံဆရာတော် ကမ္မဋ္ဌာနာစရိယ ဘဒ္ဒန္တ ၎င်းန္ဒက-၏ အောင်မြင်ရေး ကျင့်စဉ်နှင့် အောင်မြင်စေကြောင်း နည်းလမ်းကောင်း

ဘုန်းကြီးရဲ့ အောင်မြင်ရေး ကျင့်စဉ်ကတော့ နေ့စဉ် မေတ္တာပွားတယ်၊ ပဋ္ဌာန်း(၂၄)ပစ္စည်းနှင့် ပဋ္ဌာန်းပစ္စယ နိဒ္ဒေသကို ရွတ်တယ်။ ပြီးတော့မှ မေတ္တာပွားများကာ အမျှဝေ၊ သာဓုခေါ်တယ်၊ ကျင့်စဉ်ကတော့ တစ်နာရီလောက် ကြာတယ်၊ ဒါပေမယ့် မြတ်စွာဘုရားကို ပဋ္ဌာန်းနဲ့ ပူဇော်ပြီး မြင်အပ်, မမြင်အပ်ကြတဲ့ ပုဂ္ဂိုလ်တွေကိုလဲ မေတ္တာပွားများ၊ အမျှပေးဝေတဲ့အတွက်ကြောင့် အားလုံးရဲ့ ကူညီစောင့်ရှောက်မှုတွေကို ရရှိတယ်။ ကိုယ်စောင့်နတ်မှအစ အားလုံးသော ပုဂ္ဂိုလ်တွေရဲ့ ပံ့ပိုးမှုတွေကို ရတာမို့ တစ်စတစ်စ အောင်မြင်လာတာပါ။

တကယ်တော့ ပုံမှန်မေတ္တာပွား၊ ပုံမှန် ပဋ္ဌာန်းရွတ်၊ ပုံမှန် အမျှပေးဝေနေတဲ့အခါ အားလုံးသော မြင်အပ် မမြင်အပ်တဲ့ ပုဂ္ဂိုလ်တွေက နေ့စဉ် ကျေးဇူးတင်ပြီး မ,စကြတာ အလိုဆန္ဒတွေ ဖြည့်ပေးကြတာ ထင်ပါတယ်။ သူတို့တွေက ပဋ္ဌာန်း ပုံမှန် ရွတ်ပွားပူဇော်နေတဲ့ပုဂ္ဂိုလ်ကို စိတ်မညစ်ရအောင်လို့ တန်ခိုးနဲ့ ဆန္ဒတွေ ဖြည့်ပေးတာပါ။

ဘာလို့လဲဆိုတော့ ပုံမှန် ပဋ္ဌာန်းရွတ်ပွားပူဇော်တဲ့ ပုဂ္ဂိုလ်က စိတ်ညစ်လို့၊ အဆင်မပြေလို့ ပဋ္ဌာန်းမရွတ်ရင် အမျှမဝေရင် သူတို့ တရားမနာရမှာ အမျှကုသိုလ် မရကြမှာကို စိုးရိမ်လေ့ရှိကြတယ်။ ဒါကြေင့် ပဋ္ဌာန်းအမြဲရွတ်တဲ့ ပုဂ္ဂိုလ်ကို သူတို့က စိတ်ချမ်းသာအောင် အစဉ်အောင့်ရှောက်ပေးနေကြတာပါ။
ဘုန်းကြီးလဲ ပဋ္ဌာန်းရွတ်ရင်းနဲ့ပဲ သာသနာပြု လုပ်ငန်းတွေကို အောင်မြင်အောင် ဆောင်ရွက်နိုင်ခဲ့တယ်။ တန့်ကြည်တောင် ဆရာတော်ကြီးနဲ့အတူ အမေရိကန်နိုင်ငံကို  သာသနာပြု ကြွရောက်နိုင်ခဲ့တယ်။ စင်္ကာပူ၊ မလေးရှား၊ ယိုးဒယား စတဲ့ နိုင်ငံများကိုလည်း ကြွရောက်သာသနာပြုခဲ့ပြီ။


အောင်မြင်စေကြောင်း နည်းလမ်းကောင်း လေးပါးကို မိန့်လိုပါတယ်။ အဲဒါကို သမ္ပတ္တိစက်လေးပါး ကောင်းကျိုးတရား တိုးပွားပြည့်စုံခြင်းလို့ ခေါ်ပါတယ်။ အဲဒီ သမ္ပတ္တိစက် လေးပါးနဲ့ ပြည့်စုံရင် မကြာမြင့်မီ စည်းစိမ်ဥစ္စာ ပေါများခြင်း၊ ပြန့်ပွားခြင်းအဖြစ်သို့ ရောက်ရှိနိုင်ပါတယ်။ 
ယင်းလေးပါးကတော့---
၁။ ပတိရူပ ဒေသဝါသစက်=ကုသိုလ်ကောင်းမှုပြုရန်နှင့် လုပ်ကိုင်စီးပွား တိုးတက်ဖြစ်ထွန်းရန်အတွက် သင့်လျော်လျောက်ပတ်သောအရပ်၌ နေထိုင်ရခြင်း။
၂။ သပ္ပုရိသူပ နိဿယစက်=မှီခို ကိုးစား အားထားလောက်သော သူတော်ကောင်း၊ မိတ်ဆွေကောင်းကို မှီခို ဆည်းကပ်ရခြင်း။
၃။ အတ္တာသမ္မာ ပဏိဓိစက်=မိမိ၏စိတ်ကို ကုသိုလ်ဖြစ်ကြောင်း ကောင်းကျိုးဖြစ်ကြောင်းကို ကောင်းမွန်စွာ ထားရှိခြင်း။
၎။ ပုဗ္ဗေစ ကတပုညတာစက်=ရှေး၌ ဆည်းပူး ပြုလုပ်ခဲ့ဖူးသော ကောင်းမှုကုသိုလ်ရှိသောသူ ဖြစ်ရခြင်းတို့ပါပဲ။


ဘဝလမ်းညွှန် သြဝါဒကိုတော့---
လူရယ်လို့ဖြစ်လာရင် စကားပြောဆို ဆက်ဆံကြရပါတယ်။ အဲဒီလို စကားပြောဆို ဆက်ဆံပြောဆိုရာမှာ အင်္ဂါ ၁၀-ပါးနဲ့အညီ ပြည့်စုံညီညွတ်မှုရှိအောင် ပြောဆိုတတ်ဖို့ လိုအပ်လှပါတယ်။
အဲဒီလို အင်္ဂါ ၁၀-ပါးနဲ့အညီ စကားပြောဆိုတတ်ပြီဆိုရင် မိတ်ဆွေကောင်းများ တိုးပွားခြင်း၊ ကောင်းဂုဏ်သတင်း ကျော်စောထင်ရှားခြင်း၊ အစီးအပွား တိုးတက်ဖြစ်ထွန်းခြင်း၊ အစရှိတဲ့ ကောင်းကျိုးတရားများကို ရရှိခံစားကြရမှာ ဖြစ်ပါတယ်။ လူတိုင်းအတွက် လိုအပ်တဲ့ စကားပြောဆိုရာ အင်္ဂါ ၁၀-ပါးကတော့---


၁။ ကာလဝါဒီ=အချိန်အခါ အခြေအနေကို ကြည့်၍ ပြောချိန် ပြောခွင့် သင့်မှသာ ပြောဆိုရခြင်း။
၂။ ဘူတဝါဒီ=ထင်ရှားခိုင်မာ သေချာဟုတ်မှန်သော စကားကိုသာ ပြောဆိုရခြင်း။
၃။ ဓမ္မဝါဒီ=သင့်လျော်၍ ဖြစ်နိုင်သော တရားနှင့်စပ်ဆိုင်သည်ကိုသာ ပြောဆိုရခြင်း။
၎။ အတ္ထဝါဒီ=ကောင်ကျိုးစီးပွားနှင့် စပ်သည်ကိုသာ ပြောဆိုရခြင်း။
၅။ ပိယဝါဒီ=ချစ်ခင်နှစ်လိုဖွယ်သောစကားကိုသာ ပြောဆိုရခြင်း။
၆။ မိဟိတ ပုဗ္ဗဘာဏီ=မျက်နှာအသွင် ကြည်လင်ပြုံးရွှင်မှု ရှေ့ထား၍ ပြောဆိုရခြင်း။
၇။ အ,တုရိတ ဝါဒီ=အဆောတလျင် မဟုတ်ဘဲ မနှေးမမြန် မှန်မှန်သာ ပြောဆိုရခြင်း။
၈။ မိတဘာဏီ=မပိုမလို မတိုမရှည် သင့်တော်လျော်ကန်အောင် ဝေဖန်ချင့်ချိန်၍ ပြောဆိုရခြင်း။
၉။ ပေါရီ=မြို့ကြီးသူ မြို့ကြီးသားတို့၏ အသုံးအနှုန်း ဓလေ့ထုံးကိုယူ၍ ပြုမူပြောဆိုရခြင်း။
၁၀။ ဝိသဒ ဝါဒီ=သန့်ရှင်းပြတ်သားစွာ ပြောဆိုရခြင်းတို့ပဲ ဖြစ်ကြပါတယ်။

 ဦးတိုးအောင်

No comments: