Friday, August 31, 2012

ကျေးဇူးတော်ရှင်တို့၏ ကျေးဇူးစကား ( ၄ )

( သမ္ပဇညတရား ၄-ပါး )
၁။ အလုပ်တခုကို မလုပ်ခင်က အကျိုးအရှိဆုံး အလုပ်ကို ဉာဏ်ဖြင့် ဆင်ခြင်ထားခြင်း။
၂။ အကျိုးအရှီဆုံး အလုပ်ပင်ဖြစ်စေကာမူ နေရာ ဌာန အချိန်ကာလ စသည်တို့ကို သင့်-မသင့် ဉာဏ်ဖြင့် ဆင်ခြင်ခြင်း။
၃။ သင့်မြတ်သည့် အလုပ်ခွင် ရိပ်သာတွင်းသို့ ရောက်လာသောအခါ မပြတ်မလပ် ပြုလုပ်ရှုမှတ်နေခြင်း။
၎။ မိမိအားထုတ်သည့် အလုပ်၌ မတွေမဝေ သိခြင်း-ဟူ၍ ၄-မျိုး ဖြစ်ပေသည်။

( တရားထူး မြန်မြန် ရအောင် )
အရှင်ကစ္စာယန မထေရ်က ဝိပဿနာတရား အားထုတ်ကြသော ပုဂ္ဂိုလ်တို့ တရားတွေ မြန်မြန်တွေ့ရအောင်၊ တရားတွေ ရှေ့သို့ မြန်မြန်တက်ရအောင်၊ တရားထူး တရားမြတ်များ မြန်မြန်ရအောင် လိုက်နာရမည့် အချက် ၄-ချက်ကို ဟောကြားခဲ့ပါသည်။
၁။ မျက်စိအမြင် ကောင်းသူပင်ဖြစ်စေကာမူ ကန်းနေသည့် ပုဂ္ဂိုလ်လို ကျင့်ရမည်။
၂။ နားအကြား ကောင်းသူပင်ဖြစ်စေကာမူ နားမကြား နားပင်းနေသော ပုဂ္ဂိုလ်လို ကျင့်ရမည်။
၃။ စကားပြော ကောင်းသည့် ဉာဏ်ပညာနှင့်ပြည့်စုံသော ပုဂ္ဂိုလ် ဖြစ်စေကာမူ စကားမပြောတတ်သည့် ပုဂ္ဂိုလ်လို ဆွံ့,အ နေသည့် ပုဂ္ဂိုလ်လို ကျင့်ရမည်။
၎။ အားအင်ပြည့်ဝ သန်စွမ်းသူ ဖြစ်စေကာမူ အားအင်နည်းပါးနေသော လူမမာကဲ့သို့ ကျင့်ရမည်။

( လူငယ်များဘဝ ကောင်းမွန်လာစေဖို့ )
ကလေးသူငယ်များကို သူတို့ဘဝ ကောင်းမွန်လာကြစေရန် ---
၁။ အလှူဒါနပြုတတ်၊ လှူတတ်အောင်လည်း ပြုပြင်ပေးရမည်။
၂။ သီလစသော ကိုယ်ကျင့်တရားများ ကျင့်တတ်အောင်လည်း ပြုပြင်ပေးရမည်။
၃။ မှန်ကန်သည့် ဘက်မှာ ရပ်တည်ဖို့ရာ ရဲရင့်သော စိတ်ဓာတ်များ ရှိလာရအောင်လည်း ပြုပြင်ပေးရမည်။
၎။ အတတ်ပညာ သင်ရာ၌ စွဲမြဲသောစိတ်ဓာတ်ဖြင့် တတ်မြောက်အောင် သင်ယူဖို့ရန်လည်း ပြုပြင်ပေးရမည်။
၅။ စီးပွားဥစ္စာရှာဖို့ အရွယ်ရောက်လာသောအခါ စီးပွားရှားရာ၌ စွဲမြဲသော စိတ်ဓာတ်ဖြင့် ရှာဖို့ရန်လည်း ပြုပြင်ပေးရမည်။

( ပညတ်ကိုခွါ ပရမတ်သာ )
ဝိပဿနာတရား ရှုမှတ်ပွားများ အားထုတ်ကြသည့် အခါမှာ တရားတွေ မြန်မြန်တွေ့၊ တရားတွေ မြန်မြန်တက်ရအောင် ပုံသဏ္ဌာန်ဒြပ်ပညတ်များကို အာရုံမပြုဘဲ ခွါနိုင်သမျှခွါ၍ ပရမတ်သဘောများကိုတော့ သိနိုင်သမျှသိအောင် စူးစိုက်၍ ရှုမှတ်ကြရပါတယ်၊ ပစ္စုပ္ပန်ကိုလည်း တည့်နိုင်သမျှ တည့်အောင် စူးစိုက်၍ ရှုမှတ်ရပါတယ်၊ ဝိပဿနာတရား ရှုမှတ်တဲ့အခါမှာ  အရေးကြီးတဲ့ အချက် ၂-ချက်ပင် ဖြစ်ပေတယ်။
ပညတ်နဲ့ ပရမတ် ခွဲခြား၍ သိထားဖို့ရာမှာ ပကတိသော မျက်စိဖြင့် မြင်ကောင်းသည့်၊ ကိုင်တွယ်သုံးသပ်၍ ရကောင်းသည့် အထည်ဒြပ်များသည် ပတ်များပင် ဖြစ်ပေတယ်။
ပကတိသော မျက်စိဖြင့် မမြင်ကောင်းသည့်၊ ကိုင်တွယ်သုံးသပ်၍ မရကောင်းသည့် သဘော၊ စိတ်ဖြင့် ဉာဏ်ဖြင့်သာ တွေ့ထိကောင်းသော ပူသည့်သဘော၊ အေးသည့်သဘော၊ မာသည့်သဘော၊ ပျော့သည့်သဘော၊ တွန်းကန်သည့်သဘော၊ တောင့်တင်းသည့်သဘော၊  လှုပ်ရှားသည့်သဘော၊ ဖွဲ့စည်းထားသည့် သဘော၊ ယိုစီးနေသည့် သဘော၊ နာသည့်သဘော၊ ကျင်သည့်သဘော၊ ထုံသည့်သဘော၊ စသည့်သဘောများသည် ပရမတ် ဖြစ်ပေတယ်။
ထိုပညတ်နဲ့ ပရမတ် ၂-မျိုးတို့တွင် ပညတ်များကိုတော့ ခွါနိုင်သမျှခွါ၍ ပရမတ် သဘောများကိုတော့ သိနိုင်သမျှသိအောင် စူးစိုက်၍ ရှုမှတ်ကြရပါတယ်။

သဒ္ဓမ္မရံသီရိပ်သာ ဆရာတော် အရှင်ကုဏ္ဍလာဘိဝံသ

No comments: