Friday, August 31, 2012

ကျေူးဇူးတော်ရှင်တို့၏ ကျေးဇူးစကား (၅)

(ကုသိုလ်-အကုသိုလ် )
မကောင်းတာကို မပြုလုပ်နဲ့၊ ကောင်းတာဟူသမျှ ပြုလုပ်၊
မကောင်းတာဆိုတာ ဘယ်ဟာလဲ၊ ကောင်းတာဆိုတာ ဘယ်ဟာလဲ၊
အပြစ်ရှိတာဟာ မကောင်းမှု၊ အပြစ်မရှိတာဟာ ကောင်းမှု၊
အပြစ်ဆိုတာ ဘာလဲ၊ မိမိကိုဖြစ်စေ သူတပါးကိုဖြစ်စေ ထိခိုက်ရင် အပြစ်၊ မိမိသူတပါး နှစ်ဦးသားမှာ ဘယ်သူ့ကိုမျှ မထိခိုက်တာဟာ အပြစ်မဟုတ်၊
ဘယ်သူ့ကိုမျှ မထိခိုက်သော အလုပ်သည် အပြစ်မရှိသောကြောင့် ကောင်းမှုကုသိုလ်၊
တဦးဦးကို ထိခိုက်သော အလုပ်သည် အပြစ်ရှိသောကြောင့် မကောင်းမှု အကုသိုလ်။။

( ကံနယ် မကျဉ်းစေနဲ့ )
ဘုန်းကြီးတို့ ပရိသတ် မျက်ခြည်မပြတ်ပါစေနဲ့၊ အခုပြောနေတာက ကံ- ကံရဲ့ အကျိုးကို ပြောနေတာပါ၊
ဘုန်းကြီးတို့ တချို့ ဗုဒ္ဓဘာသာတွေကိုယ်တိုင် ကံလို့ပြောလိုက်ရင် စိတ်က ဘယ်ရောက်သွားသလဲဆိုတော့
အဲ---ဟိုအတိတ်ဘဝတွေဆီကိုသာ ရောက်သွားတယ်၊
ဟိုး---ရှေးရှေးဘဝတွေက ပြုခဲ့တဲ့ ကောင်းမှု မကောင်းမှုတွေကိုသာ ကံလို့ ယူဆကြတယ်။ အဲဒီ ကောင်းမှု မကောင်းမှု
တွေကြာင့်ပဲ ဒီဘဝမှာ ကောင်းကျိုး-မကောင်းကျိုးတွေ ရတယ်။ ဒီလောက်ပဲ နယ်ကျဉ်းကျဉ်းကလေးပဲ သိကြမြင်ကြတယ်။ ဒါ ဘာကြောင့်လဲဆိုတော့ ကံနဲ့ ကံရဲ့အကျိုး သဘာဝကို ရှင်းရှင်းလင်းလင်း သဘောမပေါက်ကြလို့ပါပဲ။

အကြောင်းရှိရင် အကျိုးဖြစ်ရမယ်၊ အကျိုးပေါ်ရတယ်၊ ဒါ လောကရဲ့ သဘာဝပဲ၊ ဒါ ( Law of cause and effect )
 လောကရဲ့ အကြောင်းအကျိုး သဘာဝဟာ ဒီအတိုင်းပဲ။
သို့သော်လည်း တခု သတိပြုရမှာက အကြောင်းကြောင့် အကျိုးဖြစ်တယ်ဆိုတာ ရံဖန်ရံခါမှာ အကြောင်းဖြစ်ပေါ်ပြီး အချိန်အများကြီးကြာမှ အကျိုးဖြစ်ပေါ်တယ်။
အကြောင်းအားကောင်းရင် ချက်ချင်း အကျိုးဖြစ်ပေါ်ပြီးတော့
အကြောင်းအားသေးရင် အချိန်ကြာမှပဲ အကျိုးဖြစ်ပေါ်မယ်။
ဒီနေရာမှာ ဘုန်းကြီးတို့ ဘာတွေ့ရသလဲ---
၁။ အခုလုပ်တဲ့ ကံအကြောင်းတရားကြောင့် အခု အကျိုးရတာလည်း တွေ့ရတယ်။
၂။ ဒီဘဝမှာ အခုလုပ်တဲ့ ကံအကြောင်းတရားကြောင့် ဒီဘဝအတွင်းမှာပဲ နောင်တချိန်ချိန်မှာ အကျိုးရတယ် ဆိုတာလည်း သိရတယ်။
၃။ ဒီဘဝမှာ လုပ်တဲ့ ကံအကြောင်းတရားကြောင့် ဒီဘဝမှာ အကျိုးပေးဖို့ အချိန်မရလိုက်တဲ့အတွက် သေပြီးနောက် တချိန်ချိန်မှာ အကျိုးဖြစ်ပေါ်ရတာလည်း ရှီတယ်လို့ တွေ့ရတယ်။

( အလုပ်တိုင်း ကံ မမြောက် )
ကိုယ်နှုတ်စိတ်ဖြင့် ပြုလုပ်သော်လည်း ပြုလုပ်တိုင်း ကံ မဖြစ်ပေ၊ ကံအရာ မမြောက်ပေ၊
အကောင်းအဆိုး ရည်ရွယ်ချက် တခုခုဖြင့် တက်ကြွထက်သန်သော စိတ် ဦးဆောင်လျက် ပြုလုပ်မှသာ ကံအရာ မြောက်၍ ကံ-ဟု ခေါ်သည်။
အဲဒီအလုပ်ထဲမှာ ကောင်းတဲ့ရည်ရွယ်ချက်၊ ဆိုးတဲ့ရည်ရွယ်ချက် တခုခု ပါရမယ်။ အဲဒီလို ကောင်းတဲ့ရည်ရွယ်ချက်၊ ဆိုးတဲ့ ရည်ရွယ်ချက် တခုခုပါပြီးတော့ အဲဒီအလုပ်ကို လုပ်ဖို့ရာ ထက်သန်တဲ့စိတ် ရှိရမယ်။
အဲဒီအင်္ဂါ နှစ်ပါးနဲ့ ပြည့်စုံတဲ့ အလုပ်မှသာလျှင် ကံအရာ မြောက်တယ်။ အလုပ်ဆိုတိုင်း ကံအရာ မမြောက်ဘူးနော်။
ကံအရာ မမြောက်မဘူးဆိုတာ ထူးခြား ထင်ရှားတဲ့အကျိုးကို ဖြစ်ပေါ်စေနိုင်တဲ့ အခြေအနေ မရှီဘူးလို့ ဆိုလိုပါတယ်။
ကံအရာ မြောက်တယ်ဆိုတာ ထူးခြား ထင်ရှားတဲ့ အကျိုးကို ဖြစ်ပေးစေနိုင်လောက်အောင် အင်အားပြည်တဲ့ အကြောင်းတရားအဖြစ် ရောက်တယ်လို့ ဆိုလိုပါတယ်။ ကျမ်းဂန်များမှာတော့ ကမ္မပထ မြောက်တယ်လို့ သုံးနှုန်းလေ့ ရှိပါတယ်။
တက်ကြွထက်သန်သော စိတ်ကို စေတနာလို့ ခေါ်တယ်။
ယင်း တက်ကြွထက်သန်သော စိတ်သဘော စေတနာသည် ကိုယ်-နှုတ်-စိတ်အလုပ်များ ဖြစ်ပေါ်ခြင်း၏ အကြောင်းရင်း အခြေခံဖြစ်၏။ ထို့ကြောင့် ထိုစေတနာ (တက်ကြွသော စိတ်သဘော)ကို မြတ်စွာဘုရားက ကံ-ဟု နာမည်တပ်တော်မူ၏။

ကမ္ဘာ့ဗုဒ္ဓသာသနာပြု ချမ်းမြေ့ဆရာတော်

No comments: